Marquis de Sade : La sèrp (Le serpent)
Traduction en provençal : Anthony Walker

LA SÈRP




    Tot lo mond a conegut au començament d'aqueste sègle Madama la presidenta de C..., l'una dei femnas lei pus amablas e la pus polida de Dijon, e tot lo mond l'a vista careçar e tenir publicament sus son liech la sèrp blanca que va faire lo subjèct d'aquesta anecdòta.
    Aquest animau es la melhora amiga qu'agui agut au mond, disiá-ela un jorn, a una dama estrangiera que veniá la veire, e que pareissiá curiosa d'aprene lei motius dei suenhs qu'aquesta polida presidenta aviá per sa sèrp ; ai amat passionament dins un temps, contunhèt-ela, madama, un join òme plasent, obligat de s'alunhar d'ieu per anar culhir dei lausiers ; independament de nòstre comerci reglat, aviá exigit qu'a son exemple, a de certanas oras convengudas, nos retirariam cadun de nòstra costat dins deis endrechs solitaris per nos ocupar absoludament que de la nòstra tendressa. Un jorn, a cinc oras dau ser, anent m'estremar dins un cabinet de flors au bot de mon jardin per li tenir paraula, plan segur que ges deis animaus d'aquesta especia podiá esser intrat dins mon jardin, apercebi subitament a mei pès aquesta bestia plasenta, de quala me vesètz idòlastra. Vouguèri fugir, la sèrp s'estendèt davant ieu, aviá l'èr de me demandar gràcia, aviá l'èr de me jurar qu'èra plan luenh d'aver enveja de me faire mau ; m'arresti, consideri aquest animau ; me vesent tranquilla, s'aprocha, fa cent voltas a mei pès mai lestas leis unas que leis autrei, ne podi m'empechar de portar ma man sus eu, i passa delicatament sa tèsta, lo preni, aussi lo metre sus mei genolhs, s'i arruca e pareisse i dormir. Un trébol inquiet m'arrapa... Dei lagremas rajan maugrat ieu de meis uelhs e van inondar aquesta plasenta bestia... Esparpelat per ma dolor, me considera... gemega... ausa enauçar sa tèsta au ras de mon sen... lo careça, e retomba avalit... Ai mon Dieu, aquò es fach, m'escridèri, e mon amant es mòrt ! Quiti aqueste luech funèst, emportent amb ieu aquesta sèrp a la quala un sentiment escondit sembla me ligar come maugrat ieu... Fataus avertiments d'una vòtz inconeguda de la quala interpretaretz come vos plairà lei pausas, madama, mai uech jorns aprep, apreni que mon amant es estat tuat, a l'ora mesme onte la sèrp m'èra apareguda ; ai jamai vougut me separar d'aquesta bestia, me quitarà qu'a la mòrt ; me siáu marida despuei, mai sota lei clausas expressas que l'òm me l'enlevariá ges. E en acabant aquestei mòts, l'amabla presidenta arapèt sa sèrp, la faguèt repausar sus son sen, e li faguèt faire com'a un espanièu cent polits torns davant la dama que l'interrogava.
    O Providéncia, que tei decrèts son inexplicables, s'aquesta aventura es tant vertadiera que tota la provincia de Borgònha l'assegura !


Marquis de Sade Petites Histoires du Marquis de Sade

©2007 Sade-ecrivain.com - Contact - Forum -